Monday 22 April 2013

தலை குனிந்து கொள்ளுவோம்

தமிழன் என்று சொல்லித் தலை நிமிர்ந்தென்ன
தரணி முழுவதும் பரந்திருந்தென்ன
தனக்கென நாடு தரணியில் தமிழனுக்கு இல்லையே
பரணி பாடிப் பகை முடித்தென்ன
போர்க்களம் கண்டு பகை முடித்தென்ன
பொட்டல் வெளிகூட எமக்கென இல்லையே

அடிமை விலங்கை அறுத்திட எண்ணி
அத்தனை வீரரும் ஆகுதியாயினர்
சுற்றம் துறந்து சுகங்கள் துறந்து
சூளுரைதே சூழ்பகை வெல்ல
தேசம் காக்க தம்மை ஈந்தனர்

எத்தனை எத்தனை ஆயிரம் வேங்கைகள்
நித்தமும் தம்மை நெக்குருக்கியே
நேசத்துடன் தம் தேசம் காத்திட
நெருப்பாற்றில் நீச்சல் போட்டனர்

தற்க்கொடையாளராய் தம்மை ஈந்து
தரணியில் தமக்கெனத் தடம் பதித்திட
கடற் புலிகளாய் கரும்புலிகளாய்
காரிருளிலும் காவியம் படைத்தனர்


எத்தனை ஆண்டுகள் ஏக்கத்துடன் காத்திருந்தோம்
எத்தனை எத்தனை ஈகைகள் செய்திருந்தோம்
அத்தனையும் எத்தர்களால் அநியாயமானதுவே
ஓட்டுமொத்தமாய் எம்மினம் ஒழிந்துபோனதுவே

ஏன் இப்படி ஆனது எம் தேசம் யார் தந்தது இப்படிச் சாபம்
ஒற்றுமை இல்லாத் தமிழனால் ஒன்று படாத் தமிழனால்
அத்தனையும் அழிந்ததே அத்தனையும் அழிந்ததே
தமிழன் என்று சொல்லி நாம் தலை குனிந்து கொள்ளுவோம்
தரணி எங்கும் உள்ள நாம் தலை குனிந்து கொள்ளுவோம்

No comments:

Post a Comment